كنتولة فيل سنغرى عمرو 7 سنين تحدى ديناصورات جنينة واشنطن #khamem

 الباحثين متع جامعة نيو يورك حبو يشوفوا فماشي فيل نابغة في الجنينة متع الحيونات متع واشنطن. هذا شقترحوا ملول في المجلة العلمية Plos One. شدوا لفيولة متع الجنينة و حطولهم غصن متع شجرة معلق الفوق بعيد على خرطومهم. و طيشولهم مكعب بلوح. حبوا يشوفوا فماشي فيل مل فيولة سنغرا و وليدها يجم يلقى الحل. لفيولة متع جنينة الكل بهمة كان فيل واحد برك اسمو كنتولة. كنتولة فيل عمر 7 سنين  تابع سلالت لفيولة لهنود. جاتو لحظة متع حقيقة، اللحظة إلي كيتبداو تحلو في مشكل و تبداو واحلين 5 سوايع و من بعد على غفلة يجيكم الحل حتى ومتومة راقدين. تقوموا كي لمهبلة تمشيو تحلو مشكلتكم. كنتولة جاتو نفس لحكاية كان يكور بالمكعب و يغزر للغصن شاهيه، أخضر مافيهش حتى ورقة صفرة. هكاك و فهم لحكاية لازمو يحط المكعب تحت الغصن و يحط ساقيه على المكعب و هكاك خرطوم يولي يخلط للغصن.

 © Foerder et al., 2011 - Plos One

 المدهش في لحكاية إلي كنتولة لقى الحل وحدو و هذا فرق كبير بينو و بين حيونات السرك إلي يعلموهم إنوامر. كنتولة خمم و لقى الحل وحدو. هذا ميعنيش انو لفيولة الكل نابغة، لازم

تصير إحصائيات. و زيد على هذاكة كنتولة عمرو 7 سنين و لفيولة لخرين ديناصورات عمرهم 60 سنا. حتى لهنا منجمو نقول كان "كنتولة سنغرى".

أركستر دودة الضوء #khamem

دودة الضوء هي نوع من لخنافس إلي تشعل. برشة يعيطولهة دودة لكلب. لعباد تقول إلي لخنفوسة هذي تمرض بالكلب لكلاب إلي تاكلها. هذا موش صحيح. منعرش منين جات لحكاية هاذي. أما مفما حتى بحث حسب منعرف يبرهنها.

الخنفوسة هذي تشعل بلخضر في مؤخرتها. كيفاش؟ عندها برتئين (proteïne) اسمها لسيفرين (Luciférine) تتصنع في مؤخرتها ، كي لسفرين تتخلط بيلكسجان، تولي تشعل بلخضر.

خنفوسة الضوء من Wikipedia

تستعمل الأنثى متع دودة الضوء هلضاهرة هذي بش تجلب الذكر. يعني خلاصة القول الأنثى تشعل مؤخرتها بش تشعل الذكر.

في جنوب اسيا، فما صنف من هلخنفوسة يعيش في مجموعات، فوق شجرة مثلاً، مايقعدش ديمة شاعلة أما تضرب فلاشت كل مدة معينة ملوقت. برشة يتلمو مع بعظهم و يعملوا أركستر (Orchestre) يبداو يشعلوا مع بعضهم. Philippe Laurent إنتبه للحكاية هذي كعمل رحلة لجنوب اسيا عامة 1897. ألي لفت إهتمام انو هل لخنافس هاذم موش يشعل برك أما يشعلوا مع بعضهم. قعد باهت كيفاش ألف من خنفوسة و الكلها تضرب فلاش فرد وقت. مصدقش عينيه و قال لحكاية فها إن! كيفاش نحن لعباد بمخاخنة و بش تنظم أركستر و حشتك بمايسترو. كيفاش لخنافس هذي توصل تشد الريثم (rythme) ؟

بلكشي فما ملكة كما عند النمال و الكلها تبعها؟! العلماء قالوا لا بعد متخابطوا بين بعضهم: واحد يقول لا الرطوبة هي ألي تحكم في ريثم متاعهم، لاخر يقول السخاناة و حد منجم يفسر لحكاية. عامت 1960 Jhon Buck و مرتو مشاو لتايلندا ، شدو شوية خنافس و سيبوهم في بيت لوتيل متاعهم. سكرو الضوء و قعدوا يغزرو. لخنافس دخلوا بعضهم و بداو يضربوا في فلاشات كل وحدة على روحها و بعد شوية وقت بداو يتنظم حتى لين ولاو يضربوا في فلاش مع بعضهم. حتى ملبيت ولات تضوى أكثر ، تقولش عليه فلاش متع appareil photo! شد منبعد وحدة منهم و حطهى وحدها. و جاب فلاش إصطناعي و بدا يفلاشي فللخنفوسة المسكينة. بدات الخنفوسة تفلاش زادة. هو يضرب فلاش و شادد نفس ريثم و الخنفوسة بدات تفلاشي ملول بعيدة عل فلاش الإصطناعي و من بعد بشوية بشوية ولات تفلاش فرد وقت معاه. هذا إلي خلاه يقول ممكن ياسر مفماش مايسترو أما الخنفوسة تبع جيرانها، و تصلح روحها بشوي بشوية، طايح و تزيد في ريثم متاعها لين تولي تضرب فلاش معا لخنافس لخرين فرد وقت. عامت 1989, Steven Strogatz و Rennie Mirollo برهنوا رياضيا انو كان كل خنفوسة إتبع جارتها، لخنافس الكل تولي تضرب فلاش فرد وقت. كما بعد حفلة ولا ثياتر (theatrou)، الناس تصفق ملول داخل بعضها و من بعد الكلهم يوليو يصفقوا فرد وقت. ألي نستنجوه مل لحكاية هذي، إلي نسبة تطور المخ ماعندها حتى دخل. خنفوسة مخها بسيط و تخلط تتنظم بطريقة هذي كما الانسان. و نخليكم على زوز فيديوات لولا متع تصفيق...

و الثانية متع ماترونومات (إلي يستعملوه جماعة الموزيكا بش يشدو الريتم)

هوني اللوحة هي إلي تقوم بدور تبادل المعلومات مبين المترونومات.